thomasreite.no

Skribent: thomas Page 1 of 14

10 ting verd å dele – september 2023

By

On 18. september 2023

In lister

Her er nokre av dei tinga som har fanga interessa mi i det siste.

Sidewalk Garden

Ein kar som gjer eit urbant hageprosjekt ut av eit asfaltfortau i San Fransisco.

These 38 Reading Rules Changed My Life

Ryan Holiday har 38 råd for korleis ein kan bli betre på å lese bøker, og ta vare på innhaldet.

Rhoneisms

Patrick Rhone har dilla på Hobonichi, akkurat som meg.

Style is consistent constraint

Stephen Ango virkar som ein smart type. Han står bak Obsidian, eit svært interessant dataprogram for å sortere tankar og idéar, og for å skape nye. Han skriv om å det å ha ein eigen stil, som handlar om dei tinga ein bevisst og konsekvent vél vekk.

Apropos Obsidian, så er eg i gang med den nye David Sparks sin nye Obsidian Field Guide.

25 Levels of Freestyle Soccer Skills: Easy to Complex

Det ser veldig gøy ut å bli flink til å trikse med fotball. Og med måten ho forklarer det på i denne videoen ser det nesten ut som det kan være mogleg å lære.

Multi-layered calendars

Ein som skriv om kalenderar og korleis han får det til å funke. Tidsfordriv er alltid interessant.

Nibble and your appetite will grow

Stephen Ango igjen. Om det å ta ting litt og litt, så blir det meir etterkvart.

A little bit every day

Meir av den samme tankegangen, om å få framgang ved å gjere ting litt og litt.

Benjamin Franklin Was Time Blocking Before it Was Cool

Eg prøvar å gjere som Benjamin Franklin, og planlegge meir detaljert, og med fleire faste bolkar.

McCartney on not-knowing and doing it now

Den kreative, litt uforutsigbare kreative prosessen til Paul McCartney.

Farvel til framtida

By

On 6. september 2023

In politikk, samfunn

Det lovar ikkje godt for framtida at den mørkeblå høgresida vinn fram i skulevalet. Det går kaldt nedover ryggen på meg når Fpu kaprar kvar femte stemme, og når Unge Høgre-leiaren skryt av at dei unge gir blaffen i klimakrisa.

Det gjeld å tenkje på seg sjølv no, tydelegvis.

Effekten av at verda har blitt eit kjipare sted, er altså ikkje å stå meir saman, men å stå lenger frå kvarandre.

Vi går mot ei framtid der dei rikare blir rikare, dei fattige blir fattigare, og vi har eit økosystem som er i ferd med å kollapse. At unge reagerer med likegyldigheit og apati kan kanskje la seg forklare, men likevel er det svært, svært skummelt.

Heldigvis ser ikkje alt mørkeblått ut. Vinden ifra høyre vil snart snu.

Bøker. Sommar.

By

On 13. august 2023

In bøker, lesing, lister

Det er sommar, enn så lenge, og nattbordet mitt har tidvis vore stabla fullt av bøker eg held på å lese. Som sagt før så er eg ikkje flau over å låne masse bøker, sjølv om eg ikkje rekk å lese dei ferdig. Så lenge vi har offentlege bibliotek, må dei brukast, tenker no eg.

Med jamne mellomrom trålar eg gjennom diverse lister og anbefalingar for å finne bøker, alltid på jakt etter store leseopplevingar. Her er nokre av bøkene eg har lånt, lest, gitt opp eller digga.

An Immense World av Ed Yong. Eg sto på venteliste, lånte den og likte den. Blei ikkje ferdig, lånte den på nytt, blei ikkje ferdig, sto på venteliste, osv. Vurderer om eg skal sette den på venteliste igjen, men det er ikkje så lett med bøker det tar lang tid å komme gjennom.

The Dawn of Everything, A New History of Humanity av David Graeber og David Wengrow. Her sto eg óg på venteliste, leste ikkje ferdig, leverte den inn igjen, lånte den på nytt. Den er lang, men den er kjempebra. Men det er ikkje ein page-turner akkurat, så det kan hende den er for lang til at eg rekk å komme gjennom.

Tomorrow, and tomorrow, and tomorrow av Gabrielle Zevin. Den skulle visstnok vere kjempebra. Den sto på fleire lister over bøker som skulle vere bra. Og den har eit skikkeleg kult cover. Men innhaldet fenga ikkje nok.

Spare av Prince Harry. Den leste eg. Heile greia. Eg overraska meg sjølv litt der, men det som gjorde at eg lånte boka var eit veldig fascinerande intervju med ghost writeren hans.

Seven Habits of Highly Effective People av Stephen Covey. Dette er ein klassikar som har inspirert mange, virkar det som, så den har eg på lista.

The Wager av David Grann. Dette er årets bok så langt. Og for ei bok! Den fortener eit kapittel for seg, men kort fortalt er det ein slags historisk true crime, om eit engelsk skipsforlis ved kysten av Chile rundt 1740. Ei heilt vanvittig forteljing. Når slike bøker dukkar opp er det verdt leitinga.

Bloggen

By

On 9. juli 2023

In sjølvinnsikt, tankar, tekstar

Blekket har vel ikkje akkurat spruta i denne bloggen i det siste.

Eg starta å skrive her som eit skriveeksperiment for meg sjølv. Eg ville prøve å rydde meg eit lite hjørne av internett, sette fram ei lita pappkasse og stille meg opp på internettets speaker’s corner. Kanskje kjem det etter kvart nokre tilfeldig forbipasserande.

Eg tenker framleis at det å skrive ein liten blogg er noko alle burde gjere. Eller – kanskje ikkje alle, men mange fleire. Ingen får glede av tankar og idéar som ikkje blir delt med nokon. Og det finst plass til fleire tankar, idéar, erfaringar, innspel og historier. Inkludert mine.

Kanskje er det nokon som finn nokre papirlappar i ein skuff hos meg ein dag, lenge etter at eg er borte.

Kanskje er det nokon som finn dei gamle notatbøkene mine og klarar å tolke noko ut av dei. Men mest sannsynleg vil ingen greie å få tak i alle dei små tekstane og snuttane som eg har lagra på telefonen. Det meste vil forsvinne. Med mindre det er gitt ut. Publisert.

Så når eg skriv her, så gjer eg det mest for min eigen del. For å formulere nokre av dei tinga eg tenker på, med litt enkel finsliping av formuleringar før eg trykker på send-knappen og lar det stå til.

Og så gjer eg det for den eller dei som ein gang kanskje vil lure på kva det var som gikk gjennom hovudet til ein person som meg sånn mot midten av 2020-åra. Kanskje skriv eg mest for meg sjølv? Uansett så ligg det no der ute.

Visdomsorda til Kevin Kelly

By

On 29. mai 2023

In læring, livsråd, sjølvinnsikt

Noko av det første eg skreiv om på denne bloggen var om tech-guruen og forfattaren Kevin Kelly og dei 68 livsråda han la ut då han fylte 68. Ei fantastisk samling av korte, innsiktsfulle råd, samla og destillert gjennom eit langt liv. Desse visdomsorda har kun vore å finne på nettsida hans, men no har han gitt ut ei bok der han har samla alle: Excellent Advice for Living: Wisdom I Wish I’d Known Earlier. Eg har sans for visdomsord. Merlin Mann (ein annan kul podcast-fyr som eg har høyrt mykje på) har også ei fin samling som eg har skrive om før.

Eg skal definitivt lese boka. I mellomtida held eg på å lytte til eit par fine intervju med Kevin Kelly, mellom anna i Knowledge Project av Shane Parrish og Daily Stoic med Ryan Holiday.

Her er eit sitat frå boka til Kevin Kelly:

Bok eg har lest i vår: Blodmåne av Jo Nesbø

By

On 6. mai 2023

In bøker, lesing

Bøker som kommer og bøker som går.

Eg har nettopp lest ferdig Blodmåne av Jo Nesbø, med gode gamle Harry Hole i hovudrolla. Ei lang bok, men absolutt ein page turner. Likevel kjem eg ikkje heilt under huden på karakterane. Blir liksom ikkje glade i dei. Føler meg litt tom etter å ha lest den. Eg sit for det meste igjen med masse meiningslaus, utspekulert brutalitet. Kan ikkje seie det er direkte givande.

Roald Amundsen

By

On 25. april 2023

In historie

Då eg var liten var Roald Amundsen min store helt. Eg las om han i leksikon. Eg såg kappløpet til Sydpolen på TV som på 80-talet. Eg blei grufullt fascinert over lagnaden til Robert Falcon Scott og hans menn, som gjorde det skjebnesvangre valet å bruke ponniar i staden for hestar, og omkom etter at dei hadde komme seg fram til Sydpolen, der dei såg det norske flagget sto og blafra. Og framleis sit der ein stad og klamrar seg fast i kvarandre, frosne fast inne i eit telt i isødet.

Eg lagde min eigen kiosk på gata heime i Søvika, men i staden for saft, selde eg heimelagde kopiar av Roald Amundsen sin signatur, som eg kopierte frå leksikonet vårt med blyant og matpapir.

I fjor sommar tok eg familien med til huset til Amundsen på Svartskog. Der står huset uforandra etter at han brått dro på ekspedisjon til isødet i 1928.

Det er som om han nettopp har dratt. Doen er tett, med ein handskriven lapp til advarsel. Urørt i snart hundre år.

Eg fekk også kikke på boka han held på å lese, og som ligg på nattbordet hans. Den første Poirot-boka av Agatha Christie. Han leste ikkje boka ferdig, og den blei liggjande igjen på nattbordet gjennom andre verdskrigen, sekstitalet, russetida til pappa, studietida mi, heile levetida til ungane mine, og til i dag.

Det ligg altså ei krimroman på eit nattbord i Svartskog som ikkje har blitt lest ferdig på hundre år.

Kottke 25

By

On 27. mars 2023

In diverse

Jason Kottke si nettside og blogg er ein av mine store favorittar. Han starta nettsida Kottke.org i 1998, og 25 år er veldig lenge i nettsamanheng. Sjølv oppdaga eg bloggen for eit par år sidan, og eg har blitt ein stor fan. Det eg diggar med han er den uovertrufne teften hans for å finne forunderlege fenomen som viser verdas vidunder. Eg deler verdssynet hans. Verda er vidunderleg.

Her står www både for World Wide Web, og What a Wonderful World.

Alle pratar om AI

By

On 24. mars 2023

In samfunn, teknologi

Eller kanskje dei eigentleg ikkje gjer det. Eg høyrer at folk pratar om AI på podcastar og youtube, men eg veit ikkje kor mange rundt meg som eigentleg er så opptatt av kva som skjer. Uansett om ein er interessert i AI eller ikkje, er eg sikker på at det kjem til å endre samfunnet på måtar vi ikkje greier å ta inn over oss.

Eg høyrde på New York Times sin tech-podcast Hard Fork her om dagen. Dei pratar om nye GPT4, og sjølv om dei er garva tech-journalistar, har dei bakoversveis. Denne roboten har bestått eksamen i jus. Den har hyra folk til å gjere oppgåver for seg, og lurt dei til å tru at dei kommuniserer med ein ekte person som treng hjelp. Og mange andre ting som var utenkjelege for litt sidan.

Dette er altså den nye normalen, men det føles alt anna enn normalt. Slik er det vel å stå midt i eit teknologisk paradigmeskifte.

2023 så langt

By

On 21. mars 2023

In bøker, diverse, lesing, livet, livshistorie

Eg begynte på denne posten rundt midten av mars, og før eg visste ordet av det var vi tre fjerdedelar uti. Heilt til no har eg følt at vi såvidt er i gang med det nye året. Men uavhengig av kva eg føler, går året ufortrødent vidare.

Så kva har eg fylt tida mi med i år?

Eg held på å lese ei flott, svær bok som heiter An Immense World av Ed Yong. Boka har dukka opp på fleire av listene over fjorårets beste bøker, så da bestilte eg den på Deichman. Eg bestilte riktignok alle dei andre bøkene eg fekk tak i frå desse boklistene i tillegg. Dei fleste har blitt liggande i stabelen av bøker heilt til eg får purring. Men eg likar denne boka. Eg synest det er viktig å vise kor fantastisk planeten er, og denne boka får til det. Det er som å lese ein science fiction-roman, berre at den handlar om heilt ekte dyr som faktisk finst, og som opplever verda på ufatteleg mange rare måtar som vi menneske ikkje heilt kan forstå. Eg visste for eksempel ikkje at det finst så mange fargar som berre dyr kan sjå. Boka får skryt av meg.

Eg har også fått meir og meir sansen for Stephen Fry. Eg las (eller høyrde på) Mythos, ei gjenfortelling av gresk mytologi fortalt av forfattaren sjølv. Eg brukte lang tid på den, men den har gitt meg gode minner frå bilturar gjennom eit endelaust, frodig og rullande landskap på Madagaskar akkompagnert av forteljingar om greske gudar, fortald av makelause Fry. For tida høyrer eg på opplesinga hans av Sherlock Holmes-bøkene. Mannen har eit heilt ensemble av skodespelarar innabords. Og for nokre fascinerande bøker det er.

Eg har fått fornya entusiasmen min for Pat Metheny. Eg har oppdaga plata hans frå 2020, From This Place, med den aldeles flotte tittellåta som eg prøvar å lære meg på gitar. Eg følger óg tett med på MARO, som held på å gi ut EP, og slepp nydelege låtar som perler på ei snor.

Eg har venta lenge på denne våren. Sjølv om isen ikkje er tint, merkar eg sola kjem, og det trengs.

Page 1 of 14

Next

Powered by WordPress & Theme by Anders Norén