Stikkord: bøker

Å lese bøker

På det lokale biblioteket er det ein automat som hjelper til med å hente, låne og levere bøker. Sist gong eg var der tenkte eg at eg skulle ta ein liten utskrift av lista.

Eg merka at eg blei litt utilpass då maskina tilsynelatande ikkje stoppa å skrive ut, ei lang remse bølga seg ut av automaten. Eg hadde nådd grensa over bøker eg kan låne. Tretti.

Eg er kanskje litt junkie når det kjem til bøker. Eg klarar ikkje å gå innom biblioteket utan å ha med meg ei bok eller fem. Nattbordet mitt har så mange bøker at eg må stable aerodynamisk.

Spørsmålet er aldri om eg les, men heller kor mykje eg får lest.

Eg har ein bunke på nattbordet. Ei bunke i Allbok-appen. Ei bunke med lydbøker i Audible. Heldigvis har eg det ikkje sånn at eg er nøydd til å lese ferdig ei bok før eg tar opp ei anna. Det er litt befriande, samtidig som det gjer at det blir litt vel mange bøker i omløp. Som eit badekar som er akkurat litt for fullt av godt og varmt vatn.

Eg les alltid på noko. Det er meir som mitt daglege brød enn eit prosjekt som skal bli ferdig. Målet er sjølve lesinga, ikkje å kome gjennom bunken.

Bøker å lese om igjen

Enkelte bøker har gjort ekstra sterkt inntrykk på meg. Eg lurar på korleis det ville ha vore å lese dei om igjen. Ville det sterke inntrykket ha blitt borte, eller bli enda sterkare? Dette har eg tenkt å teste ut på tre bøker som eg har hatt i bakhovudet i veldig mange år.

  1. Ringenes herre av J.R.R. Tolkien. Eg leste denne på ungdomsskulen og blei fullstendig oppslukt.
  2. Les Misérables av Victor Hugo. Monumental bok, så mange dramatiske historier. Denne boka sette preg på ein ung tenåring. Dei fleste detaljane hugsar eg ikkje, men eg hugsar kloakken under Paris.
  3. Captain Corelli’s Mandolin av Louis de Bernières. Eg blei vemodig då eg var ferdig med denne. Eg tenkte lenge på korleis hovudpersonane hadde det og korleis det gjekk med dei.

Eg er nysgjerrig på korleis det vil vere å besøke desse bøkene på nytt. I verste fall vil kanskje litt av magien bli borte, i beste fall vil alt kome tilbake. Sjølv om bøkene er dei same, vil eg tru at eg har forandra meg. Det gjenstår å sjå.

Powered by WordPress & Theme by Anders Norén